कैलाली, । मोहन्याल गाउँपालिकाका अध्यक्ष देवीदत्त उपाध्यायले जिल्ला समन्वय समितिको निर्वाचनमा मतदान गर्न नपाउने भएको छ ।

निर्वाचन आयोगका उपसचिव लक्ष्मी शर्माले मुख्य निर्वाचन अधिकृतको कार्यालयमा पत्र लेख्दै गाउँपालिका अध्यक्ष उपाध्यायलाई समन्वय समितिको निर्वाचनको मतदान प्रक्रियामा सहभागी नगराउन निर्देशन दिएका छन् ।

आयोगले लेखेको पत्रमा “गाउँपालिकाका अध्यक्ष उपाध्याय विरुद्ध अख्तियार दुरुपयोग अनुसन्धान आयोगबाट भ्रष्टाचारको कसुरमा मुद्दा दायर भएकोले  सो मुद्दाको किनारा नभएसम्मको अवधिभर सार्वजनिक पद धारण गरेको व्यक्ति आफ्नो पदबाट स्वतः निलम्बन हुने भएकोले यसरी निलम्बन भएको व्यक्तिले त्यस्तो पदको कुनै पनि अधिकार प्रयोग गर्न मिल्ने नदेखिएको छ ।”

यसअघि मुख्य निर्वाचन अधिकृतको कार्यालयमा समन्वय समितिका उपप्रमुख राजेन्द्रप्रसाद खनालले अध्यक्ष उपाध्यायलाई निर्वाचन प्रक्रियामा सहभागि नगराउन माग गर्दै निवेदन दिएका थिए ।

कैलाली जिल्ला समन्वय समितिको निर्वाचन भोलि हुँदै छ ।

निर्वाचनमा एमाले र  नागरिक जनमुक्ति पार्टीबीच गठबन्धन बनेको छ ।