काठमाडौँ, ।स्वास्थ्य तथा जनसङ्ख्या मन्त्रालयले अत्यावश्यक काम बाहेक विदेश भ्रमण नगर्न अपिल गरेको छ । 
कोभिड–१९ को ओमिक्रोन भेरिएण्टको सङ्क्रमणलाई दृष्टिगत गर्दै अत्यावश्यक काम बाहेक विदेश भ्रमण नगर्न हुन तथा साबधानी अपनाउनुहुन मन्त्रालयले अपिल गरेको हो । 
 सहप्रवक्ता डा. समिरकुमार अधिकारीले नेपालमा सङ्क्रमण फैलिन नदिनका लागि अत्यावश्यक काम वाहेक विदेश भ्रमण नगर्न आग्रह गरिएको बताए  । उनका अनुसार हालसम्म उक्त भेरियन्ट नेपालमा फेला परेको छैन ।

उनले ओमिक्रोन भेरियन्टको आवश्यक निगरानी तथा परीक्षणको दायरालाई फराकिलो पारिएको बताउनुभयो “नयाँ देखिएको यो भेरिएण्टलाई समयमै सावधानी अपनाई नेपालमा प्रवेश हुन नदिन र जनजीवनलाई सामान्य राख्न मन्त्रालय तथा सबै निकाय तीब्र रूपमा एक भएर काम गरिरहेको अवस्था छ” उनले विज्ञप्ति जारी गर्दै भनेका छन् । 

उनका अनुसार उक्त भेरियन्ट बढी सङ्क्रामक तथा सबै उमेर समूहका व्यक्तिहरूमा असर पार्ने देखिएको छ । ओमिक्रोन सङक्रमण रोक्न  सबै सचेत र जिम्मेवार बनी जनस्वास्थ्यका मापदण्डहरूको पालना गर्न गराउन समेत मन्त्रालयले अनुरोध गरेको छ । 

केहि दिन अघि मात्र अफ्रिकी मुलुकमा पहिचान गरिएको ओमिक्रोन भेरिएन्ट (द्य.१.१.५२९) साउथ अफ्रीका तथा एशियाका केहि मुलुकहरूमा अहिले तीव्र विस्तार भइरहेको अवस्था छ ।

विश्व स्वास्थ्य संगठनले यो नयाँ भेरिएण्टलाई विश्वव्यापी भेरियन्ट अफ कन्सर्न भनी घोषणा गरेको छ । 
मन्त्रालयले कोभिड–१९ विरुद्धको खोपले कोभिड–१९ रोगबाट बचाउन मद्दत गर्ने भएकोले आफूलाई पायक पर्ने ठाउँमा गई खोप लगाउनु हुन पनि अनुरोध गरेको छ ।