काठमाडौँ, ।स्वास्थ्य तथा जनसङ्ख्या मन्त्री विरोध खतिवडाले बालबालिकालाई स्कुलमा नै पुगेर कोरोना भाइरस विरुद्धको खोप लगाउने बताएका छन् ।

उनले १२ देखि १७ बर्ष उमेर समूहका बालबालिका लागि स्कुलमा नै खोप केन्द्र राखेर खोप लगाइने बताए । उनका अनुसार यही पुस ४ गतेदेखि बालबालिकालाई खोप लगाइने छ ।  

सरकारले १२ देखि १७ बर्ष उमेर समूहका बालबालिका लागि कोरोना भाइरस विरुद्धको खोप लगाउनका लागि मोडर्ना खोप ल्याएको छ । 
उनले बुस्टर डोज लगाउनका लागि सरकारले नीतिगत र व्यवहारिक रुपमा तयारी गरिसकेको बताए । 

“महामारी फैलिदै गयो भने वुस्टर डोज आवश्यक रहेको छ । प्रधानमन्त्री शेरवहादुर देउवासंग पनि बुस्टर डोज लगाउने बारेमा मेरो सल्लाह भइसकेको छ,” मन्त्री खतिवडाले भने, “थप सुरक्षित हुनका लागि दुई मात्रा लगाएका व्यक्तिले ६ महिनापछि बुस्टर  डोज लगाउने हो । आवश्यक पर्दा सरकार बुस्टर डोज दिन तयार रहेको छ ।” 

नेपालमा भेरोसेलको दुई मात्रा लगाएका ६० बर्षभन्दा माथिका ज्येष्ठ नागरिकलाई भने सरकारले अतिरिक्त एक मात्रा खोप दिने यसअघि नै निर्णय गरेको छ । 
विश्व स्वास्थ्य सङ्गठनले ज्येष्ठ नागरिक, अशक्त विरामी, मुटु रोगी, मृर्गौला, दीर्घरोगीलाई मात्र बुस्टर डोज लगाउनका लागि सिफारिस गरेको छ ।